Семейде оң жағалауда жаңа спорт кешенінің құрылысы жоспарланып отыр — бұл Қазақстан президенті Қасым-Жомарт Тоқаевтың 2025 жылы атап өтілген Абай Құнанбайұлының 180 жылдығына орай ұйымдастырылған «Абайға құрмет» акциясы аясындағы сыйлығы.
Жобаны қаржыландыру бірыңғай оператор — «Самұрық-Қазына» АҚ арқылы, «Samruk-Kazyna Trust» қоры есебінен жүзеге асырылады.
«Ауданы 2000 шаршы метр болатын екі қабатты спорт кешені әртүрлі ойын түрлеріне арналған спорт залын, 100 көрерменге арналған трибунаны, күрес және бокс залдарын, жаттығу залын және қосалқы бөлмелерді қамтиды. Кешен жеделсатымен жабдықталады, соның арқасында екінші қабат барлық келушілер санатына, соның ішінде мүмкіндігі шектеулі азаматтарға да қолжетімді болады», — делінген хабарламада.
Аталған нысан облыс орталығының оң жағалауында, Сәтбаев көшесінде салынады. Бұл нысанның құрылысына шамамен 1,6 миллиард теңге бөлінеді, ал оның құрылысы келесі жылы аяқталмақ.
