Жуырда қала әкімі Әділет Қожанбаев сол жағалаудағы сауда нүктелерін, атап айтқанда «Жаңа базар» және «Океан» базарларын, сондай-ақ «Мереке» мен «Южный» сауда үйлерін аралап, бұл нысандардың басшылары және кәсіпкерлерімен кездесті.
Кездесу барысында 1 мамырға дейін ғимараттардың сыртқы келбеті мен инфрақұрылымын жаңарту мерзімі белгіленді. Себебі бұл нысандар санитарлық талаптарға, жұмсартып айтқанда, сай келмейді.
Бұл жұмыстар біз бұған дейін жазғандай, қалалық «көк базарды» жаңғырту аясында «Мереке», «СмоКК» және «Ақшың» сауда нысандарына қатысты басталған. Жол картасына сәйкес, 2026 жылдың соңына дейін «Мереке» мен «СмоКК» базарларын жаңарту жоспарланған, ал 2028 жылға дейін «Ақшың» сауда орталығы жаңғыртылмақ.
Бұған дейін «Жансая» базары мен «Нива» сауда үйі де қатаң сынға ұшыраған болатын — бұл 1985 жылы салынғаннан бері жөндеу көрмеген «кеңестік эстетиканың» бір үлгісі іспетті нысандардың бірі.
Сол кезде облыс әкімі Берік Уәли полиция және СЭС қызметкерлерімен бірге бұл сауда орындарын аралап, шатырлардың ағып тұруы, баспалдақтардың қисайған күйі, ретсіз қойылған киоскілер, ескірген ғимарат келбеті, сондай-ақ ескі бутиктер мен контейнерлерге назар аударған еді.
«Барлық бизнес нысандарына тазалықты сақтамағаны үшін алдымен заң аясында ескерту беріледі. Оны елемегендер жауапкершілікке тартылып, айыппұл салынады. Кәсіпкерлер өз нысандарының аумағын таза әрі тәртіпте ұстауы керек және табыстың бір бөлігін абаттандыруға бағыттауы тиіс. Халыққа қызмет көрсететін сауда нысандары заманауи талаптарға сай болуы қажет», — деді сол кезде Берік Уәли, үш айлық мерзім белгілеп.
Билік бақылауды күшейтіп, талаптарды қатаңдататынын және заңда қарастырылған барлық шараларды өрескел бұзушыларға толық көлемде қолданатынын айтып отыр.
